హైదరాబాద్లోని జీడిమెట్ల పోలీస్ స్టేషన్ పరిధిలో ఏడుగురు బంగ్లాదేశ్ జాతీయులను పోలీసులు అరెస్ట్ చేశారు. ఎలాంటి చెల్లుబాటు అయ్యే వీసాలు, పాస్పోర్టులు లేకుండా దేశంలో అక్రమంగా నివసిస్తున్నట్లు గుర్తించిన అధికారులు వారిని అదుపులోకి తీసుకున్నారు. ఈ ఘటన గాజులరామారం హెచ్ఏఎల్ కాలనీలో వెలుగులోకి వచ్చింది.
విశ్వసనీయ సమాచారం ఆధారంగా జీడిమెట్ల పోలీసులు, ఎస్వోటీ బృందాలు సంయుక్తంగా దాడులు నిర్వహించాయి. ఓ అద్దె ఇంట్లో నివసిస్తున్న ఏడుగురు వ్యక్తులను విచారించగా, వారి వద్ద చెల్లుబాటు అయ్యే ప్రయాణ పత్రాలు లేవని తేలింది. దీంతో వారిని వెంటనే అరెస్ట్ చేసి కేసు నమోదు చేశారు.
ప్రాథమిక విచారణలో నిందితులు అక్రమ మార్గాల ద్వారా భారత్లోకి ప్రవేశించినట్లు పోలీసులు గుర్తించారు. గత కొంతకాలంగా దేశంలోని పలు ప్రాంతాల్లో తలదాచుకుని అనంతరం హైదరాబాద్కు వచ్చినట్లు సమాచారం. ఈ నేపథ్యంలో వారి కార్యకలాపాలపై పోలీసులు మరింత లోతుగా దర్యాప్తు చేస్తున్నారు.
కుత్బుల్లాపూర్ డీసీపీ ఆదేశాల మేరకు చేపట్టిన ఈ ఆపరేషన్లో నిందితులను అరెస్ట్ చేసిన అనంతరం మెదక్ జిల్లా జోగిపేటలోని డిపోర్టేషన్ సెంటర్కు తరలించారు. వారి స్వదేశానికి పంపించే ప్రక్రియను సంబంధిత అధికారులు ప్రారంభించినట్లు తెలుస్తోంది.
అక్రమ వలసలు, నకిలీ గుర్తింపు పత్రాల వినియోగంపై తెలంగాణ పోలీసులు ప్రత్యేక దృష్టి సారించారని, భవిష్యత్తులో కూడా ఇలాంటి తనిఖీలు కొనసాగుతాయని అధికారులు వెల్లడించారు.