పదేళ్లుగా పనిచేస్తున్న ఉద్యోగం ఊహించని విధంగా పోవడంతో ఐదు నెలల పాటు తీవ్ర ఇబ్బందులు పడ్డాడు ఓ వ్యక్తి. చివరకు ఆర్టిఫిషియల్ ఇంటెలిజెన్స్ (ఏఐ) సాయంతో ఇంటర్వ్యూలకు సిద్ధమై, ఏకంగా ఏడాదికి రూ.1.5 కోట్ల ప్యాకేజీతో కొత్త ఉద్యోగాన్ని సంపాదించాడు. ఈ స్ఫూర్తిదాయక అనుభవాన్ని అతడు సోషల్ మీడియా ప్లాట్‌ఫామ్ రెడ్డిట్‌లో పంచుకున్నాడు.

రెడ్డిట్‌లో "kml3141" అనే యూజర్‌నేమ్‌తో ఉన్న ఈ వ్యక్తి తన కథను వివరించాడు. ఒకే కంపెనీలో పదేళ్లు పనిచేసి, మూడు ప్రమోషన్లు పొందిన తర్వాత ఫిబ్రవరి చివరిలో తనను ఉద్యోగం నుంచి తొలగించారని తెలిపాడు. ఆ తర్వాత ఐదు నెలలు చాలా కష్టంగా గడిచాయని, ఎన్నో ఇంటర్వ్యూలకు హాజరైనా తిరస్కరణలే ఎదురయ్యాయని వాపోయాడు. కొన్ని కంపెనీలు ఖాళీలను రద్దు చేస్తే, మరికొన్ని అంతర్గత అభ్యర్థులకే అవకాశం ఇచ్చాయని పేర్కొన్నాడు.

ఈ క్రమంలోనే ఇంటర్వ్యూలలో మెరుగైన ప్రదర్శన కోసం ఏఐని ఒక కీలక సాధనంగా మార్చుకున్నానని చెప్పాడు. జాబ్ డిస్క్రిప్షన్‌ను, ఇంటర్వ్యూ చేసే వారి వివరాలను ఏఐ టూల్స్‌లో ఇచ్చేవాడినని తెలిపాడు. దీని ఆధారంగా ఏఐ.. ఇంటర్వ్యూలో అడగబోయే ప్రశ్నలు, వాటికి ఎలా సమాధానం చెప్పాలనే దానిపై సూచనలు ఇచ్చేదని వివరించాడు. ముఖ్యంగా అనవసర వివరణలు ఇవ్వకుండా క్లుప్తంగా, స్పష్టంగా మాట్లాడటానికి ఏఐ ఎంతగానో ఉపయోగపడిందని పేర్కొన్నాడు.

చివరకు అతడి ప్రయత్నాలు ఫలించి, ఏడాదికి 1,55,000 డాలర్ల (సుమారు రూ.1.48 కోట్లు) జీతం, 15 శాతం వార్షిక బోనస్‌తో ఒక కంపెనీలో ఉద్యోగం సంపాదించాడు. దీంతో అతడి వార్షిక ప్యాకేజీ రూ.1.5 కోట్లకు చేరింది. ఈ అనుభవం తనకు పట్టుదల విలువను నేర్పిందని, ఉద్యోగ ప్రయత్నాల్లో ఉన్నవారు నిరాశ చెందవద్దని అతడు సూచించాడు. కెరీర్ పురోగతికి ఏఐని ఎలా వాడుకోవచ్చో ఈ ఘటన చక్కగా వివరిస్తోంది.