నడక ఆరోగ్యానికి ఎంతో మేలు చేస్తుందని వైద్య నిపుణులు ఎప్పటి నుంచో చెబుతున్నారు. అందులోనూ రోజూ 10 వేల అడుగులు నడవడం ప్రపంచవ్యాప్తంగా ప్రముఖ ఫిట్నెస్ లక్ష్యంగా మారింది. ఈ అలవాటును వరుసగా 30 రోజులు పాటిస్తే శరీరంతో పాటు మానసిక ఆరోగ్యంలోనూ గణనీయమైన మార్పులు కనిపిస్తాయని నిపుణులు చెబుతున్నారు. గుండె పనితీరు మెరుగుపడటం నుంచి బరువు నియంత్రణ వరకు ఎన్నో ప్రయోజనాలు పొందొచ్చని సూచిస్తున్నారు.
గుండె ఆరోగ్యం మెరుగుపడుతుంది
రోజూ నడవడం వల్ల గుండె కండరాలు బలపడతాయి. రక్తప్రసరణ మెరుగవుతుంది. రక్తపోటు నియంత్రణలో ఉండటానికి తోడ్పడుతుంది. మంచి కొలెస్ట్రాల్ (హెచ్డీఎల్) పెరగడంతో పాటు చెడు కొలెస్ట్రాల్ (ఎల్డీఎల్) తగ్గే అవకాశం ఉంటుంది. విశ్రాంతి సమయంలో గుండె కొట్టుకునే వేగం కూడా క్రమంగా తగ్గుతుంది.
బరువు నియంత్రణ
10 వేల అడుగులు నడవడం వల్ల శరీరంలోని క్యాలరీలు ఖర్చవుతాయి. దీంతో బరువు తగ్గాలనుకునే వారికి ఇది మంచి వ్యాయామంగా ఉపయోగపడుతుంది. రక్తంలో చక్కెర స్థాయులు స్థిరంగా ఉండటానికి తోడ్పడటంతో పాటు ఇన్సులిన్ పనితీరు కూడా మెరుగవుతుంది.
కండరాలకు బలం
క్రమం తప్పకుండా నడిస్తే శరీర సామర్థ్యం పెరుగుతుంది. కండరాలు దృఢంగా మారతాయి. కీళ్ల పనితీరు మెరుగుపడుతుంది. భోజనం తర్వాత నడవడం వల్ల జీర్ణక్రియ చురుగ్గా సాగి కడుపు ఉబ్బరం వంటి సమస్యలు తగ్గే అవకాశం ఉంటుంది.
మానసిక ఆరోగ్యానికీ ఉపయోగమే
నడక వల్ల ఒత్తిడిని పెంచే కార్టిసాల్ హార్మోన్ స్థాయులు తగ్గుతాయి. ఎండార్ఫిన్లు విడుదల కావడంతో మానసిక ఉల్లాసం పెరుగుతుంది. ఆందోళన, నిరాశ లక్షణాలు తగ్గడంలో తోడ్పడుతుంది. రాత్రి నిద్ర కూడా మరింత ప్రశాంతంగా పడే అవకాశం ఉంటుంది.
10 వేల అడుగులు.. ఎలా అలవాటు చేసుకోవాలి?
మొదటి నుంచే 10 వేల అడుగులు నడవడం కష్టంగా అనిపిస్తే తక్కువ సంఖ్యతో ప్రారంభించి క్రమంగా పెంచుకోవాలి. ఒకేసారి ఎక్కువసేపు నడవడం బదులు ఉదయం, మధ్యాహ్నం, సాయంత్రం మూడు విడతల్లో నడవొచ్చు. మొబైల్ యాప్ లేదా పెడోమీటర్తో అడుగుల సంఖ్యను గమనిస్తే లక్ష్యాన్ని చేరుకోవడం సులభమవుతుంది. సంగీతం, పాడ్కాస్ట్లు వింటూ నడవడం లేదా కుటుంబ సభ్యులు, స్నేహితులతో కలిసి నడవడం వల్ల ఈ అలవాటు కొనసాగించడం సులభమవుతుంది. లిఫ్ట్కు బదులు మెట్లు ఎక్కడం, దగ్గరి దూరాలకు వాహనం బదులు నడవడం వంటి చిన్న మార్పులు కూడా రోజువారీ అడుగుల సంఖ్యను పెంచుతాయి.
రోజూ 10 వేల అడుగులు.. నెలలో మీ ఆరోగ్యంలో వచ్చే ఈ మార్పులు చూసి ఆశ్చర్యపోతారు!
