క్రోమ్ బ్రౌజర్లో గూగుల్ లెన్స్ ఉపయోగిస్తున్న పలువురు వినియోగదారులు ఇటీవల సాంకేతిక సమస్యలు ఎదుర్కొంటున్నారు. ముఖ్యంగా ఇమేజ్ సెర్చ్, అనువాదం వంటి ఫీచర్లు సరిగా పనిచేయడం లేదంటూ సోషల్ మీడియా వేదికల్లో ఫిర్యాదులు పెరుగుతున్నాయి. అడ్రస్ బార్లో కనిపించే గూగుల్ లెన్స్ ఐకాన్ కూడా కొందరిలో స్పందించడం లేదని వినియోగదారులు చెబుతున్నారు. ఈ సమస్యను గూగుల్ గుర్తించి, పరిష్కారంపై పని చేస్తున్నట్లు వెల్లడించింది.
ఈ సమస్య దాదాపు నెల రోజులుగా కొనసాగుతోందని వినియోగదారులు చెబుతున్నారు. మరోవైపు సెర్చ్ చేసిన తర్వాత అడ్రస్ బార్ కుడివైపున కనిపించే గూగుల్ లెన్స్ ఐకాన్ కూడా పనిచేయడం లేదని ఫిర్యాదులు వచ్చాయి. లెన్స్ను మూసివేయడానికి ఉండే బాణం గుర్తుపై క్లిక్ చేసినా ఎలాంటి స్పందన రావడం లేదని వినియోగదారులు స్క్రీన్షాట్లతో సహా వివరించారు.
క్రోమ్లో అడ్రస్ బార్లోని లెన్స్ ఐకాన్పై క్లిక్ చేయడం ద్వారా లేదా వెబ్పేజీలోని చిత్రంపై రైట్ క్లిక్ చేసి ‘Search with Google Lens’ ఎంపికను ఎంచుకోవడం ద్వారా ఈ సేవను ఉపయోగించవచ్చు. ఫొటోల్లోని వస్తువులను గుర్తించడం, ఇలాంటి ఉత్పత్తులను వెతకడం, వచనాన్ని అనువదించడం, టెక్స్ట్ను కాపీ చేయడం వంటి పనులకు ఇది ఉపయోగపడుతుంది.
గూగుల్ లెన్స్ను 2017లో పరిచయం చేశారు. ప్రస్తుతం గూగుల్ యాప్, గూగుల్ ఫొటోస్, క్రోమ్ బ్రౌజర్ ద్వారా ఈ సేవ అందుబాటులో ఉంది. క్రోమ్లో తలెత్తిన సమస్యను గుర్తించామని, త్వరలోనే అప్డేట్ ద్వారా దాన్ని పరిష్కరిస్తామని గూగుల్ తెలిపింది. అప్పటి వరకు కొంతమంది వినియోగదారులు ఈ అసౌకర్యాన్ని ఎదుర్కొనే అవకాశం ఉంది.
గూగుల్ లెన్స్లో బగ్.. క్రోమ్ యూజర్లకు ఇబ్బందులు..
